Kostnaður við að bjarga dýrategundum væri minni en bankabónusar

Nauðsynlegt er að auka fjárveitingar talsvert á heimsvísu til að koma í veg fyrir útrýmingu ýmissa dýrategunda af mannavöldum.

Ríkisstjórnir ýmissa þjóða samþykktu árið 2010 að minnka útrýmingu dýra af mannavöldum eins mikið og mögulegt er fyrir árið 2020. Þrátt fyrir fögur fyrirheit hefur lítið borið á efndum og því hefur gjarna verið borið við að ekki sé vitað hversu kostnaðarsamar aðgerðirnar þurfa að vera.

Því réðist hópur vísindamanna frá nokkrum þjóðum í að rannsaka hver kostnaðurinn gæti orðið. Niðurstaðan er sú að kostnaðurinn er talsverður og kemur til með að aukast ef ekki verður gripið til aðgerða fljótlega.

Kostnaðurinn er þó engan veginn slíkur að ríkisstjórnir komist ekki yfir hann í sameiningu. Að mati hópsins myndi kosta rúma 80 milljarða dollara að bjarga dýrategundum í útrýmingarhættu úr bráðustu hættunni og koma upp og vernda landsvæði fyrir þær tegundir.

„Okkur sem einstaklingum virðast þetta yfirgengilegar fjárhæðir, en í samanburði við ríkisútgjöld er þetta smáræði," segir Stuart Butchart, sem fór fyrir hópnum. Hann tekur sem dæmi að kostnaðurinn nái ekki helmingnum af því sem bankastarfsmenn fengu greitt í bónusa á síðasta ári.

Frá þessu er greint í breska blaðinu The Guardian.