Forseti knattspyrnusambands Suður-Afríku sætir rannsókn

Kirsten Nematandani, forseti knattspyrnusambands Suður-Afríku, er einn af fimm starfsmönnum sambandsins sem sætir rannsókn vegna gruns um hagræðingu á úrslitum í leikjum karlalandsliðs þjóðarinnar.

Alþjóðaknattspyrnusambandið FIFA hefur málið til rannsóknar. Um er að ræða fjóra vináttuleiki í aðdraganda heimsmeistarakeppninnar árið 2010 sem fram fór í Suður-Afríku. CNN greinir frá þessu.

Samkvæmt skýrslu FIFA var úrslitum í leikjum Suður-Aríku gegn Tælandi, Búlgaíu, Kólumbíu og Gvatemala hagrætt. Wilson Perumal, sem handtekinn var í Finnlandi á síðasta ári eftir að í ljós kom að hann stóð að hagræðingu úrslita í a.m.k. sjö leikjum, er talinn tengjast málinu.

Tímasetning hneykslisins er sérstaklega vandræðaleg fyrir Suður-Afríkumenn því Afríkukeppnin fer fram í landinu í janúar.