Síðasti matseðill Titanic fer á uppboð

Síðasti matseðill RMS Titanic fer brátt á uppboð í Bretlandi. Matseðillinn er dagsettur 14. apríl 1912 - sama dag og skipið sökk rétt utan við Nýfundnaland.

Á matseðlinum má sjá kræsingar sem farþegum á fyrsta farrými stóð til boða.

Uppboðshaldarar telja að matseðillinn verði sleginn á 100.000 pund eða tæpar 20 milljónir króna.

Matseðillinn var á borði Dr. Washington Dodge en hann var áhrifamikill viðskiptamaður frá San Francisco. Dodge ferðaðist með eiginkonu sinni og syni. Öll komust lífs af þegar skipið sökk.

Frú Dodge laumaði matseðlinum í veskið sitt eftir að máltíðinni lauk að kvöldi 14. apríl. Nokkrum klukkustundum seinna var Titanic sokkið í sæinn.