Umfangsmikill þjófnaður á nasistaskjölum úr danska þjóðskjalasafninu

Lögreglan í Kaupmannahöfn hefur handtekið tvo menn vegna umfangsmikils þjófnaðar á skjölum og gögnum úr danska þjóðskjalasafninu. Talið er að þjófnaður þessi hafi verið vel skipulagður og staðið yfir í ein 10 ár.

Talið er að þjófnaður þessi hafi verið vel skipulagður og staðið yfir í ein 10 ár. Mennirnir tveir hafi passað sig á því að taka aðeins fáein skjöl í einu úr lestrarsal safnsins. Annar þessara manna er tengdur Hells Angels glæpagenginu.

Skjölin og gögnin sem stolið var eru frá þeim tíma þegar nasistar hersátu Danmörku í seinni heimsstyrjöldinni. M.a. er um að ræða dómsskjöl úr réttarhöldum, lögregluskýrslur, dagbækur hermanna og orður sem nasistarnir veittu dönskum samstarfsmönnum sínum.

Þá hefur komið fram í dönskum fjölmiðlum að mikið af skjölum sem stolið var tengjast ákveðnum dönskum samstarfsmanni nasista og hugsanlega hafi þjófanir viljað stroka út fortíð hans.

Talið er að einhver hluti af þessum skjölum og gögnum hafi verið seldur nýnasistum en á heimilum beggja mannanna fannst mikið af minjagripum og fánum frá tímum nasista í Þýskalandi. Þar sem annar mannanna er tengdur Hells Angels glæpagenginu er ekki útilokað að þau samtök hafi staðið fyrir sölu á þýfinu.

Asbjörn Hellum þjóðskjalavörður segir að um ómetanleg og ómissandi skjöl og gögn fyrir danska sögu sé að ræða.

Þjófnaðurinn kom í ljós í upphafi mánaðarins en rannsókninni hefur verið haldið leyndri svo hægt væri að endurheimta eitthvað af þýfinu. Í dönskum fjölmiðlum segir að tekist hafi að endurheimta töluvert af skjölunum í fjórum húsleitum sem gerðar voru í Kaupmannahöfn í gærkvöldi.