Stjórnarandstaðan í Noregi vill fella lög um vændiskaup úr gildi

Stjórnarandstaðan á norska þinginu gerir nú kröfu um að löggjöfin um bann við vændiskaupum verði felld úr gildi. Augljóst sé að hún hefur gert líf vændiskvenna hörmulegra en það var fyrir en á sama tíma dragi ekkert úr vændi í Noregi.

Fjallað er um málið í Verdens Gang í kjölfar þess að blaðamönnum blaðsins var nýlega boðin kynlífsþjónusta af sex sinnum af vændiskonum á stuttri gönguferð þeirra um miðborg Oslóar að kvöldi til.

Trine Skei Grande formaður Vinstri flokksins í Noregi segir að löggjöfin um bann við vændiskaupum hafi reynst hrein hörmung en flokkur hennar var á móti banninu þegar það var sett á árið 2009.

Trine segir að löggjöfin hafi m.a. haft í för með sér aukið ofbeldi í garð vændiskvenna og að hið góða samband sem var milli þeirra og lögreglunnar hafi skaðast.

André Oktay Dahl einn af þingmönnum Hægri flokksins tekur undir með Trine í Verdens Gang og segir flokk sinn vilja afnema lögin. Þá skoðum byggi flokkurinn á upplýsingum frá vændiskonunum sjálfum.

Marit Nybakk þingmaður Verkamannaflokksins sem stóð meðal annarra að frumvarpinu um vændiskaupabannið segir hinsvegar að gefa verði lögunum meiri tíma. Hún vill þar að auki skerpa á aðgerðum lögreglunnar gegn vændi samhliða aukinni aðstoð við vændiskonurnar sjálfar.

Opinberar tölur í Noregi sýna að fjöldi götuvændiskvenna í Osló jókst um 28% á liðnu ári. Handtökum vegna vændiskaupa fjölgaði um 75% á fyrstu sex mánuðum þessa árs og voru 160 talsins.