Loftsteinn féll í gegnum þak á sumarhúsi í Osló

Sem betur fer var enginn í sumarhúsi þessu þegar loftsteininn féll í gegnum þak þess. Steinn er á stærð við tennisbolta og vegur yfir hálft kíló. Það sem vakið hefur athygli vísindamanna er að þessi loftsteinn er svokallað þursaberg, það er hann er samsettur af nokkrum ólíkum bergtegundum sem þjappast hafa saman í honum í gegnum aldanna rás. Þetta er talið merki þess að loftsteinn þessi hafi komið við á tveimur eða fleiri stjörnum á leið sinni til höfuðborgar Noregs.

Loftsteinninn fer nú í nákvæma rannsókn hjá norskum og alþjóðlegum vísindamönnum sem vonast til að geta lesið ýmsa vitneskju úr honum. Anna-Margrethe Thomassen eigandi sumarhússins er hæstánægð með alla athyglina sem loftsteinninn hefur hlotið. Thomassen er formlega eigandi loftsteinsins en segir að hún hafi ekki tekið ákvörðun um hvort hún selur steininn eða ekki. Loftsteinninn gæti verið þó nokkurra milljóna króna virði.