Máttu vörslusvipta móður í greiðsluaðlögun

Lýsing var í fullum rétti að beita móður í greiðsluaðlögun vörslusviptingu um miðja nótt - ef marka má nýfallinn úrskurð nefndar hjá Fjármálaeftirlitinu. Nefndin klofnaði í afstöðu sinni, en niðurstaða meirihlutans er sú að heimilisbíll þeirra sem sækja um greiðsluaðlögun er ekki í greiðsluskjóli eins og aðrar eignir.

Við sögðum í gær frá tveggja barna móður sem hugðist í gærmorgun keyra börn sín í leik- og grunnskóla en uppgötvar á bílaplaninu að fjölskyldubíllinn, sem var fullur af persónulegum munum, var á bak og burt. Í ljós kom að Lýsing hafði látið fjarlægja bílinn í skjóli nætur. Lýsing er skráður eigandi bílsins en Rós María Oddsdóttir hafði greitt af bílnum í 4 ár þegar hún sótti um greiðsluaðlögun hjá Umboðsmanni skuldara.

Eins og segir á heimasíðu Umboðsmanns skuldara er „kröfuhöfum óheimilt að taka við greiðslum vegna skulda.....meðal annars vegna bílakaupalána...."

Sem sé - hún má ekki borga. Og þá má kröfuhafi ekki ganga að eigum hennar - um það snýst hið svokallaða greiðsluskjól. En áhöld eru um hvort bílalánið sé leigu- eða lánssamningur. Þegar myntkörfulánin voru dæmd ólögleg í Hæstarétti árið 2010 - var skýrt tekið fram í dóminum að viðkomandi bílalán væri lánssamningur - klæddur í búning leigusamnings eins og það var orðað.

Eftir því sem fréttastofa kemst næst hefur aðeins einn formlegur úrskurður fallið um sambærilegt mál - hjá Úrskurðarnefnd um viðskipti við fjármálafyrirtæki hjá Fjármálaeftirlitinu, nú rétt fyrir jól. Fréttastofa fékk afrit af úrskurðinum - sem hefur ekki verið birtur. Nefndin klofnaði, þrír af fimm nefndarmönnum telja að bílalánafyrirtæki hafi mátt taka bíl af manni í greiðsluaðlögun, í stuttu máli vegna þess að fyrirtækið er „skráður eigandi bílsins". Tveir af fimm skila hins vegar séráliti og komast að þveröfugri niðurstöðu að bílalánafyrirtækið sé „í raun ekki eigandi bifreiðar, heldur lánveitandi" og því „óheimilt" að taka bílinn af manni í greiðsluaðlögun.

Því virðist nokkuð ljóst, að viðkomandi lagaákvæði, eða bílasamningar, eru ekki mjög ljósir.