Óvissan í Grikklandi íþyngir Ítalíu og Spáni

Óvissan í Grikklandi, sem sífellt dregst á langinn, hefur greinilega endurvakið ótta á mörkuðum um að skuldavandi Grikklands geti smitast til annarra evruríkja.

Evran féll í gær og skuldabréf féllu einnig í verði á mörkuðum. Jafnframt versnuðu lánakjör ríkisskulda Ítalíu og Spánar, sem bendir til þess að fjárfestar óttist að þessi tvö ríki lendi í sams konar vanda og Grikkir.

Þær sífelldu tafir, sem orðið hafa á afgreiðslu fjárhagsaðstoðar til Grikklands frá Evrópusambandinu og Alþjóðagjaldeyrissjóðnum, hafa meðal annars valdið því að tafir hafa einnig orðið á samkomulagi við fjárfesta um niðurfellingu hluta af ríkisskuldum Grikklands.

Til stóð að ljúka samkomulagi um skuldbreytingu í byrjun þessarar viku, en nú þarf enn að bíða til mánudags eftir því að fjármálaráðherrar evruríkjanna leggi blessun sína yfir niðurskurðaráform grísku stjórnarinnar.

Enn er deilt um vaxtakjör nýju lánanna, en franski bankinn BNP reiknar með að niðurfelling helmings skulda gríska ríkisins kosti bankana allt að 70 til 75 prósenta tap.- gb