Meintur hryðjuverkamaður handtekinn í Washington

Alríkislögreglan í Bandaríkjunum handtók í dag karlmann á þrítugsaldri sem grunaður er um að hafa skipulagt sjálfsmorðsárás í Washington.

Hinn 29 ára gamli Amine el-Khalifi var handtekinn stuttu eftir að hann hafði verið við bænahald í mosku í Washington. Í fórum hans fannst óvirkt skotvop og vesti sem virtist vera hlaðið sprengjuefni. Efnið reyndist þó ekki vera hættulegt.

Fréttablaðið The Washington Post greindi frá því í dag að el-Khalifi hafi verið undir rannsókn Alríkislögreglunnar í tæpt ár. Þá stóð el-Khalifi í þeirri trú að meðlimir al-Qaeda stæðu við bakið á honum - þeir reyndust vera óeinkennisklæddir fulltrúar Alríkislögreglunnar.

El-Khalifi var handtekinn við Capitol-hæð í Washington en þinghús Bandaríkjanna er þar.