Tunglið gæti hafa átt hlut að Titanic slysinu

Ný rannsókn sýnir að tunglið gæti hafa átt hlut að máli þegar farþegaskipið Titanic sökk fyrir hundrað árum síðan.

Fjallað er um málið í tímaritinu Sky & Telescope en það er Donald Olson prófessor við Texasháskólann sem rannsakað hefur málið.

Vitað er að Titanic sökk eftir að hafa rekist á ísjaka þann 14. apríl árið 1912. Hinsvegar gæti tunglið hafa átt hlut að máli og verið ástæða þess að ísjakinn, ásamt fjölda annarra ísjaka var á siglingaleið Titanic.

Prófessorinn segir að þremur mánuðum fyrir Titanic slysið hafi tunglið verið í mestu nálægð sinni við jörðina í 1.400 ár. Þetta hafi valdið óvenjumikilli sjávarhæð undan ströndum Kanada og sú sjávarhæð olli því að ísjaka tók að reka frá Kanada og suður á bóginn og inn á þáverandi siglingarleiðir um Norður-Atlantshafið.

Samkvæmt útreikningum Olson var þessi hafísreki kominn nákvæmlega inn á siglingarleið Titanic þremur mánuðum eftir fyrrgreinda tunglstöðu.