Vilanova ætlar að koma fljótlega til baka

Í gær var greint frá því að Tito Vilanova, þjálfari spænska knattspyrnuliðsins Barcelona, þurfi að fara í aðgerð vegna krabbameins. Vilanova er með krabbamein í munnvatnskirtli en hann ætlar sér ekki að vera lengur en í sex vikur frá störfum.

Jordi Roura, aðstoðarþjálfari liðsins, mun taka við á meðan Vilanova verður í veikindaleyfi.

„Ég verð fjarverandi í einhvern tíma en ég kem fljótlega til vinnu á ný," er haft eftir Tito Vilanova í spænska dagblaðinu Mundo Deportivo. Hann mun fara í lyfjameðferð eftir að aðgerðin hefur verið framkvæmd.

„Við verðum að láta hlutina ganga eins eðlilega og hægt er, en vissulega setur þetta daglegt starf okkar aðeins úr skorðum. Tito er þjálfarinn og hann verður ekki á svæðinu í nokkrar vikur," sagði Sandro Rosell forseti Barcelona. „Tito er sterkur einstaklingur og við erum sannfærðir um að hann kemur fljótlega til baka."

Andoni Zubizarreta, yfirmaður knattspyrnumála hjá Barcelona, vísar því á bug að Pep Guardiola, fyrrum þjálfari liðsins muni taka við liðinu tímabundið.

Iker Casillas, markvörður spænska landsliðsins og Real Madrid, er einn fjölmargra knattspyrnumanna á Spáni sem hefur sent Tito Vilanova baráttukveðju. „Tito, það styðja þig allir í þessari baráttu. Það eru engar líkur á því að þú tapir þessum leik," skrifaði Casillas á fésbókarsíðu sína.