Í Evrópubann vegna fjármálaóreiðu

Knattspyrnusamband Evrópu, UEFA, er farið að taka hart á félögum þar sem fjármálin eru í óreiðu. UEFA er nú búið að refsa níu félögum harkalega vegna fjármálaóreiðu.

Sex félög fengu í dag að vita að þau fái ekki að taka þátt í næstu Evrópukeppni sem liðið tryggir sig inn í. Stærsta félagið sem lendir í þessum harkalega aðgerðum er spænska félagið Malaga. Menn þar á bæ eru brjálaðir yfir þessum úrskurði og telja hann of harkalegan.

Hin félögin eru Hadjuk Split (Króatía), NK Osijek (Króatía), Rapid Búkarest (Rúmenía), Dinamo Búkarest (Rúmenía), Partizan (Serbía).

Serbneska liðið Vojvodina og úkraínska liðið Arsenal Kiev voru sektuð. Máli á hendur Lech Poznan frá Póllandi var vísað frá.

Félögin hafa til 31. mars að koma sínum málum á hreint. Ef ekk þá mun dómurinn standa.