Minnast einstæðs atburðar úr loftbardaga árið 1943

Tvær fjölskyldur, önnur bandarísk og hin þýsk, munu í vikunni minnast einstæðs atburðar í loftbardaga í seinni heimsstyrjöldinni árið 1943.

Það var 20.desember þetta ár að Charlie Brown var að fljúga sundurskotinni B-17 sprengjuflugvél sinni áleiðis til Bretlands eftir velheppnaða árás á skotfæraverksmiðju í Bremen. Einn af áhöfninni var fallinn og sex aðrir illa særðir þar á meðal Brown eftir að 15 þýskar orrustuvélar höfðu ráðist á þá yfir Bremen.

Skyndilega rennir þýsk orrustuvél upp að hlið B-17 vélarinnar og Brown taldi daga sína talda. Þýski flugmaðurinn var hinsvegar að benda Brown á hvernig hann kæmist sem fyrst út úr þýskri lofthelgi og í skjól til Svíþjóðar. Síðan flaug hann á brott. Brown tókst hinsvegar að lenda á hinni illa löskuðu vél sinni í Bretlandi.

Þýski flugmaðurinn, Franz Stigler var ein af hetjum þýska flughersins og hafði skotið niður 22 flugvélar Bandamanna. Hann sagði síðar að hann hafði séð ástandið um borð í B-17 vélinni og því ákveðið að ráðast ekki frekar á hana. Fyrir sér hafi B-17 vélin verið eins og maður í fallhlíf.

Þeir Brown og Stigler hittust árið 1987 og urðu miklir vinir æ síðan. Þeir létust báðir með sex mánaða millibili árið 2008.