Ísland upp um sex sæti á styrkleikalista FIFA

Alþjóðaknattspyrnusambandið FIFA uppfærði í dag styrkleikalista sinn. Íslenska karlalandsliðið hækkaði um sex sæti á listanum og er nú í 90. sæti.

Ísland lék einn leik frá því síðasti listi var gefinn út í nóvember. Þá vann Ísland sigur á Andorra í æfingaleik ytra 2-0.

Engar breytingar urðu á þjóðunum sem skipa efstu sæti listans. Spánverjar eru efstir, þá koma Þjóðverjar og loks Argentínumenn. Ítalir skutust í fjórða sætið og Kólumbía er í því fimmta.

Hástökkvari listans var landslið Kúbu sem fór upp um 41 sæti og situr nú í 100. sæti. Landslið Haítí lyfti sér upp um átján sæti og er í 39. sæti.

Listann í heild sinni má sjá hér.