Bæli einhyrnings fannst í Norður-Kóreu

Fornleifafræðingar í Norður-Kóreu tilkynntu á dögunum að ævafornt bæli einhyrnings hefði fundist skammt frá klaustri í höfuðborginni Pyongyang.

Það var málgagn kommúnistastjórnarinnar sem greindi frá þessu í gær en þar er vísað í upplýsingar frá vísindamönnum við sagnfræðistofnun Norður-Kóreu.

Rannsóknir fornleifafræðinganna leiddu í ljós að bælið hafði verið í eigu konungsins Tongmyong sem var höfuð Koguryo-konungsríkisins (918-1392).

Samkvæmt ríkisfjölmiðlum í Norður-Kóreu fannst rétthyrndur steinn við klaustur konungsins þar sem á stóð: „Bæli Einhyrnings."

Fornleifafræðingarnir telja að klaustrið hafi verið íhugunarstaður Tongmyong.

„Uppgötvun bælisins færir sönnur á það að Pyongyang var höfuðstaður Kokuryo veldisins og miðpunktur Kóreu til forna," stóð enn fremur í frétt ríkisfjölmiðla um málið.

Þessi ótrúlega frétt fylgir í kjölfarið á umfjöllun People's Daily, dagblaði kommúnistaflokksins í Kína, þar sem Kim Jong-Un, leiðtoga Norður-Kóreu, var hampað sem kynþokkafyllsta karlmanni ársins 2012.

Heimild blaðsins var The Onion og fylgdi umfjöllun kínverska fjölmiðilsins myndasyrpa með 55 myndum af Kim. Ekkert kom hins vegar fram um að The Onion sé svonefndur háðsádeiluvefur.

Þetta var ekki í fyrsta sinn sem fjölmiðlar falla fyrir grín-fréttum The Onion.