Borgarbúar í Brussel mótmæla gervijólatré í miðborginni

Þúsundir borgarbúa í Brussel hafa mótmælt því að risastórt gervijólatré hefur verið sett upp í miðborg Brussel í stað hins hefðbundna jólatrés.

Yfir 11.000 af borgarbúunum hafa skrifað undir áskorun til borgarstjórnar Brussel um að þetta gervijólatré sé tekið niður. Í staðinn vilja þeir fá sitt hefðbundna 20 metra háa jólatré sem sótt hefur verið í Ardennaskóginn á hverju ári hingað til.

Í staðinn fyrir Ardennatréið er nú komið 25 metra hátt gervijólatré samansett úr stórum ferköntuðum ljósgrænum einingum. Borgarbúarnir segja að það hafi verið sett upp til þess að móðga ekki þá sem eru ekki kristnir og þá helst múslima.

Borgaryfirvöld ætla ekki að gefa eftir í þessu máli og segja að þetta gervijólatré sitt sé sett upp sem liður í því að árið í ár var valið ár „ljóssins" í borginni.