Níu manns fórust í gangnaslysinu í Japan

Nú liggur ljóst fyrir að níu manns létu lífið þegar hluti af þakinu á Sasago hraðbrautargöngunum vestur af Tókýó í Japan hrundi í gærmorgun.

Ekki er vitað um orsakir hrunsins en 20 sentimetra þykkar steypublokkir hrundu úr þakinu í göngunum á um 60 metra kafla. Eldur kviknaði í tveimur bílanna við hrunið og munu fimm af þeim sem fórust hafa brunnið til bana.

Björgunarstarf gekk mjög erfiðlega vegna hættu sem talin var á frekara hruni í göngunum.

Sasago hraðbrautargöngin eru ein þau lengstu í Japan og mikilvæg fyrir samgöngur í nágrenni Tókýó.