Fullyrt að vopnahlé verði undirritað í kvöld

Vopnahlé virðist vera í burðarliðnum í átökum Ísraelsmanna og liðsmanna Hamas samtakanna á Gaza ströndinni. Þetta fullyrðir forseti Egyptalands sem leitt hefur friðarumleitanir. Fullyrt er að vopnahléið verði undirritað í kvöld en Ísraelsmenn hafa ekkert staðfest.

Forseti Egyptalands, Mohammed Mursi hefur farið fyrir sáttaumleitunum síðustu daga og breska ríkisútvarpið hefur eftir honum að búist sé við því að loftárásir Ísraela hætti strax í kvöld. Þá sagði talsmaður Hamas, Ayman Taha, að vopnahlé sé yfirvofandi. Ísraelsmenn hafa ekki staðfest þetta en hafa þó gefið það út að innrás landhersins inn á Gasa hafi verið skotið á frest í það minnsta.

Ísraelsmenn hófu árásir á Gasa á miðvikudaginn var með því að fella herforingja Hamas samtakanna í loftárás. Þeir segja aðgerðirnar miða að því að stöðva eldflaugaskot frá Gaza á bæi í Ísrael. Síðan þá hafa rúmlega 110 Palestínumenn fallið og þrír Ísraelar.

Helstu leiðtogar heims hafa lagt hart að báðum aðilum að semja um vopnahlé og til dæmis hitti Guido Westerweld, utanríkisráðherra Þýskalands þá Benjamín Netanyahu forsætisráðherra Ísraels og Mahmoud Abbas leiðtoga Palestínumanna á fundum í dag.

Í dag hefur minna borið á sprengingum í Gaza samanborið við síðustu dag þótt ekki hafi þær stöðvast algerlega og sagt er að fimm Palestínumenn hafi farist. Þá fullyrða Ísraelar að varnarflaugar þeirra hafi skotið niður fjölmargar eldflaugar frá Hamas og að alls hafi Palestínumenn skotið 150 flaugum í átt að Ísrael í dag. Fimm Ísraelskir hermenn eru sagðir hafa særst í einni slíkri árás.

Ekkert hefur enn verið gefið upp um skilmála vopnahlés, ef af því verður.