Vopnahléið á Gaza heldur

Vopnahléið sem samið var um á Gazasvæðinu hefur haldið í gærkvöldi og nótt þótt fréttir hafi borist um að nokkrum eldflaugum hafi verið skotið frá Gaza skömmu eftir að formlega var gengið frá vopnahléssamkomulaginu síðdegis í gærdag. Enginn skaði varð af þeim eldflaugaskotum og Ísraelar svöruðu ekki í sömu mynt.

Íbúar Gaza fögnuðu vopnahléinu ákaft í gærkvöldi og langt fram á nótt. Öryggisráð Sameinuðu þjóðanna hefur hvatt bæði stjórnvöld í Ísrarel og Hamassamtökin að virða vopnahléið áfram og það sama segir Ban Ki-moon framkvæmdastjóri Sameinuðu þjóðanna.