Helstu dulmálssérfræðingar Breta standa á gati yfir bréfdúfuskeyti

Helstu dulmálssérfræðingar Breta standa á gati og geta ekki leyst dulkóðað skeyti frá seinni heimsstyrjöldinni sem nýlega fannst í strompi í Surrey.

Það var húseigandi í Surrey sem fann skeytið þegar hann var að endurbyggja strompinn á húsi sínu. Í strompinum var bréfdúfuhræ og á öðrum fæti þess var fest hylki með skeytinu. Dulmálið í skeytinu er í formi 27 blokka af bókstöfum.

Helst er talið að skeytið hafi verið sent af njósnara frá meginlandi Evrópu í stríðinu og það hafi átt að berast til Bletchley Park sem var dulmálsmiðstöð Breta á þessum tíma.

Bresku dulmálssérfræðingarnir hafa nú farið fram á aðstoð almennings í Bretlandi við að þýða dulmálið. Raunar gæti slíkt verið ómögulegt ef um svokallað einnota dulmál sé að ræða, það er það hafi aðeins verið notað einu sinni og enginn nema sendandi og viðtakandi vissu hver lykill þess var.

Fjallað er um málið á vefsíðu BBC. Þar segir einn af dulmálssérfræðingunum að ein besta ábendingin sem þeir hafi fengið hingað til væri frá manni sem sagði að þar sem skeytið fannst í strompi væru fyrstu tvö orðin í því sennilega: Kæri jólasveinn.