Aukin streita fylgir mörgum vinum

Stór og fjölbreyttur hópur vina á samskiptamiðlinum Facebook getur leitt til líkamlegrar og andlegrar þreytu. Þetta er á meðal þess sem kemur fram í niðurstöðum nýlegrar rannsóknar sem framkvæmd var af sérfræðingum við viðskiptaháskólann í Edinborg.

Rannsóknin sýndi fram á tengsl milli taugaþreytu og margbreytilegs vinahóps á Facebook. Vísindamennirnir telja að flókin og fjölbreytt vinatengsl á miðlinum geti leitt til ótta um að misbjóða eða móðga.

Sérstaklega er fjallað um vinatengsl yfirmanna og undirmanna í rannsókninni en samkvæmt rannsóknarniðurstöðum eru þau afar áberandi þegar kemur að kvíða meðal notenda Facebook. Næst á eftir koma tengsl foreldra og barna á miðlinum.

Ástæðan fyrir þessu er sú staðreynd að fólk á öllum aldri notar nú Facebook.

Þá kom einnig fram að aðeins þriðjungur notenda Facebook nota stillingar síðunnar til að stjórna því hvaða vinir hafa aðgang að vissu efni.