Matador slær aftur í gegn

Um helmingur dönsku þjóðarinnar situr límdur við skjáinn þegar þættirnir eru endursýndir. Meira að segja landsliðsleikur varð að lúta í lægra haldi fyrir þessum gömlu, vinsælu þáttum. TV2 í Danmörku hefur fært vinsæla spjallþætti til í dagskránni til að þeir séu ekki á sama tíma og Matador.

Þættirnir voru síðast sýndir fyrir sex árum og voru þá 1,5 milljónir manna sem fylgdust með þeim. Þar utan hafa 3,6 milljónir DVD-diskar með þáttunum verið seldir.

Sérfræðingar segja að þetta gamla, einfalda danska líf sem þættirnir lýsa höfði vel til nútímafólks sem elst upp í streitusamfélagi. Þættirnir sýna danska menningu eins og hún var 1929 til 1947 og það eru bæði ungir og gamlir áhorfendur sem fylgjast með. Þættirnir voru fyrst sýndir árið 1978. Þess má geta að þeir urðu einnig mjög vinsælir í íslenska sjónvarpinu þegar þeir voru sýndir hér á landi á sínum tíma.

Þættirnir gerast í Korsbæk, dönsku smáþorpi, þar sem bankastjórinn Hans Christian Varnæs ræður ríkjum. Til bæjarins flytur Mads Andersen Skjern, setur upp verslun og tekur til hendinni í athafnalífi bæjarins sem ekki eru allir sáttir við. Margir skemmtilegar persónur skjóta upp kollinum í Matador. Það var hinn þekkti rithöfundur Lisa Nørgaard sem átti hugmyndina af sögunni.