Eiginkona til 19 ára reyndist vera karlmaður

Belgískur maður hefur farið fram á ógildingu hjónabands eftir að hann komst að því að eiginkona hans til nítján ára hafði eitt sinn verið karlmaður.

Maðurinn, sem kallaður er Jan, greindi frá málinu í samtali við belgíska fjölmiðilinn Nieuwsbald. Jan gekk að eiga Monicu árið 1993. Hún hafði þá verið au pair á heimili Jans og fyrrverandi eiginkonu hans. Monica er indónesísku bergi brotin.

Fyrr á þessu ári fór Jan að gruna að maðkur væri í mysunni. Monica heimsótti skemmtistaði og næturklúbba í meira mæli en áður og var æ sjaldnar með fjölskyldu sinni.

Það var síðan í síðustu viku sem Jan komst að því að Monica hafði eitt sinn verið karlmaður. Hún gekkst undir kynleiðréttingaraðgerð fyrir mörgum árum.

„Það er eins og ég hafi orðið fyrir árás," sagði Jan í samtali við Nieuwsbald. „Ég kom með hana til Belgíu. Það var ekki auðvelt. Mér fannst hún vera svo falleg."

Jan, sem er 64 ára gamall, greindi frá því að hann og Monica hafi ákveðið að eignast ekki börn.

„Ég tók aldrei eftir neinu misjöfnu," sagði Jan. „Ekki einu sinni þegar við vorum náin."

Jan var eyðilagður eftir að hafa komist að hinu sanna og er nú vistaður á geðdeild.

Hann krefst þess að dómstólar í Belgíu ógildi hjónabandið en hingað til hafa þeir ekki orðið við ósk hans.