Matseðill frá Titanic seldur á 13 milljónir

Matseðill frá fyrsta farrými á farþegaskipinu Titanic hefur verið seldur á uppboði í Englandi fyrir 13 milljónir króna.

Fjallað er um málið á vefsíðu BBC. Þar segir að viðkomandi matseðill var settur saman fyrir farþega á fyrsta farrými daginn áður en Titanic lagði úr höfn í hina örlagaríku jómfrúrferð skipsins árið 1912.

Um var að ræða ferð skipsins þvert yfir Írlandshaf áður en lagt var af stað ferðina frá Southamton áleiðis til New York. Eins og alkunnugt er sökk skipið í þeirri ferð og ríflega 1.500 farþegar fórust.

Um er að ræða 12 rétta matseðil þar sem m.a. er boðið upp á ferskan humar, kássu og nautasteik. Með þessum réttum voru svo tilheyrandi vín í boði og romm með eftirréttinum.

Samhliða þessu var boðinn upp matseðill frá því að Titanic var hleypt af stokkunum í Belfast árið 1911. Í þeim kvöldverði var rjóminn af breskum aðli samankominn. Sá matseðill er einnig 12 rétta en á honum má m.a. finna, gæsalifur, skjaldbökusúpu og kjúkling frá Sussex. Þessi matseðill var sleginn á 7,5 milljónir króna.