Lést er hún beið eftir hentugu flugsæti

Eiginmaður bandarískrar konu sem lést er hún beið eftir flugsæti hefur höfðað mál á hendur flugfélaginu. Vilma Soltenz, sem var 193 kíló og þjáðist af sykursýki, var á ferðalagi um Evrópu þegar atvikið átti sér stað. Henni var tvisvar neitað um flugsæti þegar hún og eiginmaður hennar ætluðu að fljúga heim til New York frá Ungverjalandi.

Vilmu var gert að víkja úr flugvélunum þegar í ljós kom að hún gat ekki spennt öryggisbeltin. Hún lést síðan í kjölfar nýrnabilunar. Fregnir herma að hún hafi ítrekað neitað læknisaðstoð í Ungverjalandi, einfaldlega vegna þess að hún treysti ekki læknum þar í landi.

Flugfélagið sem um ræðir er Delta en í yfirlýsingu segir að starfsmenn félagsins hafi reynt að koma Vilmu til hjálpar á meðan beðið var eftir hentugu flugsæti fyrir hana.

Ekkill Vilmu hefur nú kært Delta-flugfélagið og krefst rúmlega 750 milljón íslenskra króna í skaðabætur.