Hells Angels og Bandidos eru að skipta Danmörku á milli sín

Glæpagengin Hells Angels og Bandidos í Danmörku vinna nú að leynilegu samkomulagi um að skipta borgum og bæjum landsins upp á milli sín.

Þetta hefur blaðið BT eftir heimildum sínum í hinum danska glæpaheimi. Samkomulagið kveður einnig á um að gengin megi ekki ráða til sín menn úr röðum hvors annars og að nánara samband verði tekið upp á milli þeirra til að koma í veg fyrir óþarfa ofbeldi og átök milli meðlima gengjanna.

BT segir að tveir samningafundir hafi þegar verið haldnir um málið milli Hells Angels og Bandidos.

Hvorki Jörn "Jönke" Nielsen forseti Hells Angels né Michael "Kokken" Rosenvold forseti Bandidos vildu tjá sig um málið þegar BT leitaði eftir því.