Áhyggjur af heilsufari Assange, glímir við þráláta sýkingu í lungum

Sendiherra Ekvador í London hefur miklar áhyggjur af heilsufari Julian Assange stofnanda Wikileaks og hefur beðið um fund með William Hague utanríkisráðherra Bretlands til að ræða framtíð Assange.

Julian Assange þjáist af þrálátri lungnasýkingu og sú sýking gæti versnað og orðið honum stórhættuleg í náinni framtíð. Assange dvelst í litlu gluggalausu herbergi í sendiráði Ekvador í London og talið er að skortur á fersku lofti og sólarljósi hafi gert það að verkum að lungnasýking hans fari versnandi.

Sendiherrann hefur áður farið fram á að Assange verði ekki handtekinn ef hann þarf að leita sér lækninga utan sendiráðsins. Því svöruðu bresk yfirvöld með því að segja að þau myndu ekki standa í vegi fyrir þeirri læknishjálp sem Assange þyrfti á að halda, að því er segir á vefsíðu BBC.

Sendiherrann vill hinsvegar ræða nánar um framtíð Asaange við utanríkisráðherrann sem og Theresu May innanríkisráðherra Bretlands.

Sem kunnugt er leitaði Assange hælis í sendiráðinu eftir að yfirvöld í Svíþjóð reyndu að fá hann framseldan frá Bretlandi vegna rannsóknar á meintum kynferðisafbrotum Assange í Svíþjóð. Assange á yfir höfði sér handtöku ef hann yfirgefur sendiráðið