Hætta við risavopnasamning vegna gruns um spillingu

Íraska ríkisstjórnin hefur hætt við að vopnakaupsamning sem ríkið gerði við Rússland í október síðastliðnum að andvirði 4,2 milljarða dollara. Ástæðan er sú að forsætisráðherra Íraks, Nouri Maliki, grunar að spilling eigi í hlut varðandi viðskiptin.

Hann hefur hrundið af stað rannsókn á málinu en ekki hefur verið greint nánar frá gruni Maliki eða í hverju spillingin felst.

Rússneskir embættismenn saka hinsvegar Bandaríkjamenn um að beita Íraka miklum þrýstingi sem hafi orðið til þess að ríkisstjórnin hætti við viðskiptin.

Rússland er í öðru sæti á eftir Bandaríkjunum í vopnasölu í heiminum. Rússland seldi meðal annars Saddam Hussein vopn þegar hann var enn við völd.