Hundapi tekur flækingskött að sér

Bavíani í ísraelskum dýragarði hefur tekið að sér lítinn kettling sem villtist með einhverjum hætti inn í búr hundapans.

Starfsmenn dýragarðsins uppgötvuðu sér til mikillar undrunar að bavíaninn sinnti kisunni jafnvel og eigin ungviði. Þannig týnir hann allar mögulegar flær af kettlingnum, klappar honum og hugsar almennt nokkuð vel um flækinginn.

En starfsmönnum dýragarðsins líst þó ekkert sérstaklega vel á ráðahaginn. Þeir hafa tekið eftir því að bavíaninn hafi étið mat ætlaðan kisunni, lengra nær ástin líklega ekki.

Fyrir vikið fylgjast starfsmennirnir vel með þróun mála hjá félögunum, hætti bavíaninn ekki að borða mat kattarins verður nauðsynlegt að stía þessu sérkennilega pari í sundur.

Hægt er að sjá myndband af hundapanum með kisuna á vef Sky-fréttastofunnar.