Forstjóri BBC segir af sér

George Entwistle forstjóri breska ríkisútvarpsins (BBC) hefur sagt af sér. Þetta tilkynnti hann í gær en afsögnin kemur í kjölfar mikillar gagnrýni á fréttaþáttinn Newsnight sem á dögunum fjallaði um kynferðisbrot Jimmi Savile, hins þekkta þáttastjórnanda á BBC sem lést fyrir nokkru.

Í þættinum var fullyrt að þekktur þingmaður í lávarðadeildinni, sem þó var ekki nefndur á nafn, hefði tekið þátt í brotum af svipuðu tagi.

Fljótlega tóku böndin að berast að íhaldsmanninum McAlpine lávarði og að lokum þurfti þátturinn að biðjast afsökunar og gefa það út að hann hefði verið ranglega bendlaður við málið. Við þetta bætist gagnrýni á ríkisútvarpið fyrir að hafa þaggað mál Savile niður í mörg ár.