Í nýju tvíeyki í Kína sameinast rauði aðallinn og bóndasonur

Í hinu nýja tvíeyki sem tekið hefur við æðstu völdum í Kína sameinast það sem kallað er rauði aðallinn og bóndasonur af fátækum ættum.

Greining tímaritsins Economist eða The Economist Intelligence Unit hefur sent frá sér nákvæma og mjög athyglisverða úttekt á þeim Xi Jinping hinum nýja forseta Kína og Li Keqiang hinum nýja forsætisráðherra. Töluverður munur er á hvernig þeir náðu þessum toppum á pólitískum ferli sínum.

Xi er fæddur inn í eina af valdamestu fjölskyldum Kína allt frá dögum Maó formanns. Faðir hans var til að mynda varaforsætisráðherra landsins. Í gegnum feril sinn hefur Xi ætíð gengt stöðum borgar- eða héraðsstjóra á hinum auðugri svæðum í Kína, þar á meðal stöðu borgarstjóra í Sjanghai. Hann er að hluta til menntaður erlendis.

Li aftur á móti vann sig upp í gegnum ungliðahreyfingu Kommúnistaflokksins. Hann varð handgenginn Hu Jintao fyrrum forseta landsins á þessum fyrstu árum í flokknum og síðan hefur Hu greitt leið hans upp valdastigans. Li er þar að auki hámenntaður sem lögfræðingur frá háskólanum í Peking og er einnig með doktorsgráðu í hagfræði frá þeim skóla.

Raunar segir Economist að Hu hafi viljað að Li en ekki Xi yrði eftirmaður sinn. Það féll hinsvegar í grýttan jarðveg innan stjórnmálaráðs flokksins sem taldi að þar með hefði Hu of mikil völd eftir að hafa látið af embætti.

Niðurstaða Economist er sú að þessir tveir menn muni vinna vel saman. Tímaritið telur að þeir muni stíga varlega til jarðar í pólitískum umbótum og frelsi en leggja í fyrstu áherslu á að auka velferð Kínverja sem raunar var kjarninn í stefnu fyrri stjórnar.