Ætlaði að hefja skotárás á frumsýningu Twilight myndarinnar

Karlmaður var handtekinn, grunaður um að hafa undirbúið skotárás á frumsýningu nýju Twilight myndarinnar. Það var móðir mannsins sem hringdi í lögreglu og lét vita af áformum mannsins. Maðurinn, sem er 23 ára, heitir Blaec Lammers, eftir því sem fram kemur á vef Sky.

Mamma hans lét lögreglu vita á fimmtudag þegar hún sá að hann hafði keypt vopn sem henni fannst líkjast þeim vopnum sem notuð voru í skotárás í Aurora í Colorado þegar The Dark Knight Rises var frumsýnd þar í sumar.

„Sem betur fer var þarna ábyrgur fjölskyldumeðlimur, því annars hefði getað farið mun verr," segir Steve Hamilton, lögreglustjóri í Bolivar í Missouri í Bandaríkjunum.

Tólf létust þegar James Holmes hóf skotárás á The Dark Knight Rises.