Leystu aldagamla ráðgátu

Það hefur lengi verið dularfull ráðgáta hvernig íbúum Kambodíu á 12. öld tókst að reisa hið tilkomumikla hof Angkor Wat. Nú hafa vísindamenn ráðið gátuna.

Tröllauknir steinar voru notaðir til að reisa Angkor Wat. Steinarnir eru allt í allt milli 5 til 10 milljónir að tölu og einhverjir þeirra vega tæplega eitt og hálft tonn. Því hafði það lengi vafist fyrir mönnum hvernig Khmerarnir, sem bjuggu í Kambodíu á þessum tíma, komu þeim úr grjótnámum í nærliggjandi fjalli og að byggingarstaðnum.

Khmerarnir virðast hafa grafið þéttriðið net af skurðum milli fjallsins og byggingarstaðarins og síðan siglt steinunum á milli. Þannig tókst þeim að reisa hofið á fáeinum áratugum.

Vísindamenn gerðu þessa uppgötvun eftir að þeir skoðuðu gervihnattamyndir af svæðinu. Frá þessu er sagt á fréttavef CBS.