Gera athugasemdir við kosningarnar í Úkraínu

Alþjóðlegir eftirlitsmenn í Úkraínu segja að þingskosningarnar þar um síðustu helgi hafi verið skref aftur á bak fyrir lýðræðið í landinu.

Stjórnvöld hafi misbeitt valdi sínu til að hafa áhrif á úrslitin. Þeir segja einnig að kosningabaráttan hafi einkennst af yfirgengilegri notkun á fjármagni hjá bæði stjórnar- og stjórnarandstöðuflokkunum.

Nú er búið að telja tvo þriðju hluta atkvæða. Stjórnarflokkur forsetans hefur hlotið rúmlega 34% atkvæða en helsti stjórnarandstöðuflokkurinn, sem Julia Timoshenko leiðir, er með 22,5% atkvæða. Kommúnistar hafa fengið 15% atkvæða og Udar flokkur Vitali Klitschko hefur hlotið 13%.