Eftirmynd Lance Armstrong brennd

Eftirmynd íþróttahetjunnar Lance Armstrong, sem hefur gerst sekur um umfangsmikla lyfjamisnotkun, verður brennd á báli í bænum Edenbridge í suðaustur Bretlandi um helgina.

Þá munu íbúar Edenbridge og aðrir Bretar minnast atburða sem áttu sér stað í Lundúnum þann 5. nóvember árið 1605. Þá reyndi Guy Fawkes og aðrir kaþólskir andófsmenn að sprengja Breska þingið í loft upp með því að koma púðurtunnum fyrir í kjallara Westministerhallar.

Um árabil hafa Bretar minnst þessa atburðar með því að brenna líkneski Fawkes — sumir nýta þó tækifærið til að tjá reiði sína.

„Við vorum með nokkuð langan lista af einstaklingum sem við vildum brenna," sagði Charles Laver, skipuleggjandi, í samtali við fréttaveituna AFP. Þar á meðal var Jimmy Savile heitinn. Grunur leikur á að sjónvarpsstjarnan hafi beitt allt að 300 unglingsstúlkur kynferðisofbeldi.

„En við vorum hrædd um að börn yrðu viðstödd brennuna og myndu í kjölfarið fara að spyrja spurninga," sagði Laver.

Því var ákveðið að brenna Armstrong. Risavaxið líkneski hans hefur nú verið reist í Edenbridge, klætt gulri treyju sem Armstrong fékk að sigurlaunum í Tour de France hjólreiðakeppninni.