Donald Trump boðar stórfrétt um Barack Obama

Hinn litríki athafnamaður Donald Trump hefur boðað stórfrétt um Barack Obama í dag, frétt sem Trump segir að muni mögulega hafa áhrif á forsetakosningarnar.

Trump lét þessi orð falla í sjónvarpsþætti á Fox sjónvarpsstöðinni í upphafi vikunnar. Þar sagði hann að um risavaxna frétt væri að ræða. Fréttin væri stór á alla kanta og enda. Hinsvegar sagði hann ekki neitt um innihald hennar.

Trump hefur hingað til verið framarlega í flokki þess fólks sem telur að fæðingarvottorð Barack Obama sé falsað og að Obama hafi í raun fæðst í Kenía. Væri það rétt ætti Obama enga möguleika á að taka þátt í bandarískum forsetakosningum.

Raunar gekk Trump svo langt að ráða menn til að rannsaka fortíð Obama á Hawai síðasta vor en engar fréttir hafa enn borist af þeirri rannsókn.

Í samtali við vefsíðuna TMZ segir Trump að hann muni greina frá stórfrétt sinni um hádegisbilið vestan hafs. Hann vildi ekki segja hvort hann hefði rætt við kosningastjórnir Obama og Mitt Romney um þessa frétt sína.

Við þetta má svo bæta að breska blaðið Daily Mail birti á vefsíðu sinni nú fyrir hádegið að risafrétt Trump væri að hann hefði undir höndum skilnaðarskjöl þeirra Obama og eiginkonu hans Michelle. Þetta hefur blaðið eftir vini Trump.

Svo virðist sem forsetahjónin hafi verið á barmi skilnaðar einhvern tímann í 20 ára löngu hjónabandi sínu. Gekk málið svo langt að skilnaðarskjölin voru búin til en síðan virðist þeim hafa snúist hugur.