Fellibylurinn Sandy ríður yfir Jamaíka

Vitað er um eitt mannsfall þegar fellibylurinn Sandy reið yfir Jamaíka í nótt. Skólar og flugvellir eru lokaðir á eyjunni vegna Sandy og útgöngubann er í helstu borgum og bæjum Jamaíka.

Sá sem fórst kramdist undir grjóti sem féll niður fjallshlíð í fellibylnum. Sandy gekk yfir Kingston höfuðborg eyjarinnar seint í gærkvöldi og stefnir nú norður. Sökum þessa hafa íbúar á Kúbu og á Bahamaeyjum verið varaðir við Sandy sem er fyrsta stigs fellibylur í augnablikinu með vindstyrk upp á rúmlega 35 metra á sekúndu en honum fylgir gífurleg úrkoma.