Reikna með að Assad samþykki vopnahlé í dag

Reiknað er með að Bashar al-Assad forseti Sýrlands muni formlega fallast á fjögurra daga vopnahlé í landinu í dag en flestir hópar uppreisnarmanna hafa samþykkt þetta vopnahlé.

Það var Lakhdar Brahimi sérlegur sendifulltrúi Sameinuðu þjóðanna sem kom þessu vopnahléi á í tilefni af því að ein helgasta trúarhátíð múslima er að hefjast en þessi hátíð markar upphaf hinna árlegu pílagrímaferða þeirra til Mekka í Saudi Arabíu.

Brahimi vonast til þess að með vopnahléinu gefist tækifæri fyrir hinar stríðandi fylkingar í landinu að setjast að samningaborðinu og binda endi á stríðið sem kostað hefur yfir 30.000 manns lífið.