Kosið um lögleiðingu kannabis í þremur ríkjum Bandaríkjanna

Samhliða forsetakosningunum í Bandarikjunum munu kjósendur í þremur ríkjum þar í landi kjósa um hvort lögleiða eigi notkun kannabis eða ekki.

Notkun kannabis til lækninga hefur þegar verið lögleidd í 17 ríkjum Bandaríkjanna. Sú löggjöf er í andstöðu við alríkislög í Bandaríkjunum sem kveða á um að kannabis sé ólöglegt fíkniefni.

Þann 6. nóvember hinsvegar munu kjósendur í Washington, Oregon og Colorado kjósa um hvort lögleiða eigi kannabis þannig að fíkniefnið fái sömu stöðu og áfengi.

Í frétt um málið í Washington Post kemur fram að samkvæmt skoðanakönnunum í bæði Washington og Colorado er meirihluti fyrir því að lögleiða notkun kannabis. Staðan er óljósari í Oregon. Þar að auki virðist fylgi við slíka lögleiðingu ekki síður ná til kjósenda Repúblikana en Demókrata. Raunar hafa leiðtogar Repúblikana í þessum ríkjum mælt með lögleiðingu kannabis.

Skoðanakönnun sem Gallup gerði nýlega sýnir að um helmingur Bandaríkjamanna vill að kannabis verði gert löglegt og þá ekki bara til lækninga. Í sambærilegri könnun fyrir ári síðan mældist 46% stuðningur við lögleiðingu kannabis.

Þeir sem styðja lögleiðingu horfa einkum til þess að hið opinbera gæti haft töluverðar skatttekjur af kannabissölunni.