Malala fékk óvænta heimsókn

Pakistanska stúlkan Malala Yousafzai fékk óvænta heimsókn frá fjölskyldu sinni í nótt. Malala, sem 15 ára gömul, var skotin í höfuðið af talibönum fyrr í þessum mánuði þegar hún var á leið heim úr skóla.

Stúlkan er á batavegi en faðir hennar sagði AP fréttaveitunni að horfurnar væru sannarlega góðar. Læknar á hersjúkrahúsinu í Birmingham tilkynntu fyrr í gær að Malala hefði ekki hlotið heilaskaða og að hún hefði nú þegar talað.

Það voru pakistanskir læknar sem fjarlægðu byssukúluna úr höfði Malölu en árásin átti sér stað í heimabæ hennar í Swat-héraði. Hún var seinna meir flutt til Bretlands til frekari aðhlynningar.

Faðir Malölu sagði fjölmiðlum að bati hennar væri kraftaverk. Fjölskyldan hefði ekki verið vongóð og í raun hafið undirbúning á jarðarför stúlkunnar.

Malala hefur verið ötul í baráttu sinni fyrir bættum hag barna í heimabæ sínum í norðvestur Pakistan. Hún hefur lýst ódæðisverkum talibana á bloggsvæði sínu og á vef breska ríkisútvarpsins.