Hákarl féll af himnum ofan og lenti á golfvelli

Heldur undarlegt atvik átti sér stað á golfvelli í suðurhluta Kaliforníu fyrr í þessari viku. Lifandi hlébarða hákarl féll þá af himnum ofan og lenti á tólfta teig.

Golfvallarstarfsmenn uppgötvuðu dýrið og þurftu þeir að hafa hraðar hendur, enda var fiskurinn nær dauða en lífi. Dýrið var flutt í fötu fulla af ferskvatni. Nokkrar mínútur liðu áður en starfsmennirnir áttuðu sig á að hákarlar sem þessi þurfa saltvatn. Þeir ruku því inn í eldhús, gripu saltstaukinn og hákarlinn var hólpinn.

Því næst var dýrið flutt til síns heima. Þegar komið var í sjóinn lá hákarlinn grafkyrr um stund en þaut loks af stað. Mikil mildi þykir að enginn hafi slasast þegar fiskurinn féll til jarðar. Nokkrir kylfingar höfðu verið á svæðinu örfáum andartökum áður en atvikið átti sér stað.

Líklegt þykir að hákarlinn hafi fengið far með fugli og að hann hafi runnið honum úr greipum hans fyrir ofan golfvöllinn.