Dómurinn yfir Berlusconi mildaður samdægurs

Sex ára löngum réttarhöldum yfir fyrrverandi forsætisráðherra Ítalíu, Silvio Berlusconi, lauk í dag með sakfellingu. Berlusconi var dæmdur til eins árs fangelsisvistar fyrir skattsvik. Nær öruggt þykir að hann muni áfrýja dómnum.

Berlusconi var upphaflega dæmdur í fjögurra ára fangelsi. Stuttu eftir að niðurstaðan var kunngjörð var dómurinn hins vegar mildaður. Berlusconi skal sæta fangelsisvist í eitt ár. Ástæðan fyrir þessu er sú að fangelsi á Ítalí eru að jafnaði yfirfull.

Ákæran á hendur Berlusconi tók til kaupa á dreifingarrétti á bandarískum kvikmyndum sem keyptur var í gegnum tvö skúffufyrirtæki í hans eigu. Verðið á dreifingu myndanna var blásið upp og síðan selt aftur til Mediaset, fjölmiðlafyrirtækis Berlusconis. Hann hafi síðan ekki greitt skatt af hagnaðinum.

Saksóknarar fóru fram á þriggja ára og átta mánaða fangelsisdóm yfir hinum sjötíu og sex ára gamla Berlusconi. Alls voru sakborningar í málinu ellefu. Þrír voru sýknaðir, þar á meðal stjórnarformaður Mediaset. Berlusconi og öðrum var gert að greiða rúmlega einn komma sex milljarð í tjónabætur.

Berlusconi var jafnframt bannað að gegna opinberu embætti í þrjú ár. Fyrr í vikunni tilkynnti Berlusconi að hann myndi ekki sækjast eftir embætti forsætisráðherra í þingkosningum á næsta ári og að hann myndi láta af formennsku í stjórnmálaflokki sínum, Forza Italia.

Nær öruggt þykir að dóminum verði áfrýjað. Því mun Berlusconi ekki þurfa að hefja afplánun á næstunni. Dóminn þarf að staðfesta á tveimur æðri dómstigum áður en Berlusconi stígur fæti inn í fangelsi.

Þetta er ekki í fyrsta sinn sem Berlusconi er dreginn fyrir dómstóla vegna gruns um misjafna viðskiptahætti. Hingað til hefur málunum annað hvort verið vísað frá eða fallið frá kæru vegna réttarfarslega vankanta.

Þá hefur Berlusconi einnig verið ákærður fyrir að hafa haft kynmök við stúlku undir lögaldri og greitt henni fyrir. Hann neitar sök í málinu.