Bítlarnir hættu ekki vegna Yoko Ono

Bítlarnir hættu ekki vegna Yoko Ono, líkt og lengi hefur verið haldið fram. Þetta segir Bítillinn Sir Paul McCartney í viðtali við sjónvarpsmanninn David Frost, sem sýnt verður á Al Jazeera-sjónvarpsstöðinni í næsta mánuði.

Breska ríkisútvarpið segir frá viðtalinu á heimasíðu sinni í dag. McCartney var spurður út í þátt Yoko Ono þegar þessi ein frægasta hljómsveit hætti störfum.

Hann segir að það hafi alltaf legið fyrir að Lennon myndi yfirgefa hljómsveitina og að Ono hafi ekkert með það að gera. Hún hafi vissulega haft áhrif á sýn hans á lífið, til dæmis nefnir hann að Lennon hefði aldrei samið lagið Imagine án hennar.