Vildi 50 prósent hlut í Facebook - sagðist hafa fundið á upp á síðunni með Zuckerberg

Paul Ceglia, kaupsýslumaður og frumkvöðull frá New York, hefur verið ákærður fyrir að reyna svíkja fé út úr Facebook en maðurinn fullyrti að hann ætti 50 prósent hlut í samskiptamiðlinum.

Ceglia er grunaður um að hafa búið til og eyðilagt sönnunargögn þegar hann fór í mál við Facebook þar sem hann kvaðst eiga helminginn í höfundarrétti á móti Mark Zuckerberg, stofnanda Facebook.

Árið 2003, þegar Zuckerberg var ennþá nemandi í Harvard-háskólanum, samþykkti hann að starfa með Ceglia, sem segir að þeir hafi skrifað undir tvo samninga sem gerðu hann að eiganda 50% hlutar í síðunni.

Zuckerberg segir að það sé ekki rétt, samningurinn sem þeir hafi undirritað hafi snúist um að þróa vegakort (e.street map) á internetinu - löngu áður en hugmyndin að Facebook kom til sögunnar.