New York nánast lokuð

Öllum íbúum í New York sem búa í hverfum sem liggja að sjá hefur verið skipað að yfirgefa heimili sín vegna flóðahættu í kvöld og í nótt. Það var Michael Bloomberg, borgarstjóri í New York, sem kom þessum skilaboðum til íbúa. Fellibylurinn Sandy stefnir nú hraðbyri að austurströnd Bandaríkjanna.

Í kvöld verður svo öllum almenningssamgöngum lokað, þar á meðal neðanjarðarlestakerfi borgarinnar og strætisvagnar. Á morgun verður svo öllum skólum í borginni lokað.

Fellibylurinn kostaði sextíu manns lífið á ferð sinni yfir Jamaíku, Kúbu og Bahamaeyjar í síðustu viku en gríðarlegt úrhelli og vindhraði í kringum 40 metra á sekúndu fylgir storminum. Ríkisstjóri í Connecticut segir að fólk þurfa að búa sig undir mikil flóð og mögulega versta óveður í yfir þrjátíu ár.