Eldur í flugvél - skelfing greip um sig

189 farþegar og 7 manna áhöfn voru í hættu þegar eldur braust út í flugvél rétt fyrir flugtak á flugvellinum í Antalya, í Tyrklandi, í morgun.

Flytja þurfti tuttugu og sjö á sjúkrahús en enginn er alvarlega slasaður samkvæmt fréttum Aftenposten af slysinu. Mikil skelfing greip um sig meðal ferðalanganna sem flestir voru Norðmenn.

Vélin var á leið frá Tyrklandi til Álasunds og Þrándheims í Noregi en búist er við að fólkið komist á leiðarenda síðar í dag.

Svo virðist sem eldurinn hafi átt upptök sín í flugstjórnarklefanum en farþegar voru beðnir um að yfirgefa vélina út um neyðarútganga um leið og áhöfnin tók eftir reyk.