Tyrkir banna allt sýrlenskt flug í sinni lofthelgi

Utanríkisráðherra Tyrklands hefur tilkynnt um algjört flugbann sýrlenskra flugvéla í tyrkneskri lofthelgi. Samskipti þjóðanna hafa því kólnað enn frekar en Sýrland á landamæri að Tyrklandi.

Það sem fyllti mælinn nú var að vopn fundust í farþegaflugvél sem var að koma frá Rússlandi og millilenti í Tyrklandi áður en hún ætlaði að halda áfram för sinni yfir landamærin til Sýrlands. Talið er að vopnin hafi örugglega átt að fara til sýrlenskra stjórnvalda sem reyna að berja niður uppreisn í landinu.

Flugbannið var tilkynnt sýrlenskum stjórnvöldum í gærkvöldi en þau voru þau ekki gerð opinber fyrr en í dag samkvæmt breska ríkisútvarpinu. Tyrknesk yfirvöld hafa einnig varað þarlend flugfélög að fljúga í lofthelgi Sýrlands.

Samskipti þjóðanna hafa farið kulnandi á síðustu vikum, en meðal annars skutu sýrlenskir hermenn yfir landamærin fyrir skömmu og drápu þannig fimm tyrkneska ríkisborgara.