Telja sig hafa fundið staðinn þar sem Julius Cesar var myrtur

Vísindamenn telja að þeir hafi fundið nákvæmlega staðinn þar sem Gaius Julius Cesar, einn þekktasti keisari Rómaveldis, var stunginn til bana árið 44 fyrir Krist.

Í klassískum bókmenntum segir að Cesar hafi verið myrtur fyrir utan Pompei leikhúsið í Róm en hingað til hafa ekki fundist neinar vísindalegar sannanir fyrir þeirri staðsetningu.

Við uppgröft skammt frá leikhúsinu, á stað sem heitir Largo di Torre Argentina, fannst minnismerki höggvið í stein sem er þrír metrar á breidd og tveir á hæð. Talið er víst að einn af eftirmönnum Cesar hafi reist þetta minnismerki til að fordæma morðið á keisaranum.