Dularfull eitrun lamar sjúkrahúsið á Borgundarhólmi

Dularfull eitrun meðal starfmanna sjúkrahússins á Borgundarhólmi hefur leitt til þess að loka þurfti bæði gjörgæsludeild og slysavarðstofu sjúkrahússins.

Alls hafa tíu starfsmenn sjúkrahússins verið fluttir með hraði til Rigshospitalet í Kaupmannahöfn vegna þessarar eitrunnar. Stjórn sjúkrahússins rannsakar nú eitrunina en ekki er útilokað að kalla þurfi til erlenda sérfræðiaðstoð til að komast til botns í þessu máli.

Í frétt um málið í Politiken segir að á sunnudag í síðustu viku þurfti að loka gjörgæsludeild sjúkrahússins þar sem fimm starfsmenn deildarinnar fengu þessa dularfullu eitrun. Einkenni eitrunarinnar eru mikill höfuðverkur, svimi og ógleði.

Það eru einkum hjúkrunarkonur sem orðið hafa fyrir barðinu á henni en einnig læknaritarar og tæknimenn.

Síðan hafa fimm starfsmenn í viðbót greinst með eitrunina og eru komnir á Rigshospitalet. Sökum þess neyddist sjúkrahúsið til að loka slysavarðstofu sinni í gærdag og flytja þá þjónustu annað.

Helstu læknasérfræðingar Danmerkur eru nú komnir til Borgundarhólms þar sem þeir reyna að finna orsakir eitrunarinnar.