Paul Ryan notaði súpueldhús í pólitískum tilgangi

Aðstandendur svokallaðs súpueldhúss í bænum Youngstown í Ohio, þar sem fátækum er gefinn hádegismatur á hverjum degi, eru æfir af reiði út í Paul Ryan varaforsetaefni Mitt Romney. Saka þeir Ryan um að hafa notað súpueldhúsið í pólitískum tilgangi.

Youngstown er talin fátækasta borgin í Bandaríkjunum og um síðustu helgi stormaði Paul Ryan ásamt konu sinni og þremur börnum inn í súpueldhúsið og tók fjölskyldan þar við að vaska upp potta og pönnur og var mynduð í bak og fyrir við þá iðju.

Í frétt í Politiken segir að málið sé að Ryan og fjölskylda komu í eldhúsið löngu eftir að hádegisverðinum lauk og búið var að vaska upp eftir hann. Fjölskyldan var því að vaska upp hreina potta og pönnur, í sýndartilgangi einum.